Me rastin e festës së Kurban Bajramit, Kryeministri i Kosovës, Albin Kurti, ka uruar të gjithë besimtarët myslimanë, duke vënë theksin në rëndësinë e solidaritetit, harmonisë dhe përkushtimit ndaj vlerave njerëzore.
Në mesazhin e tij urues, Kurti u shpreh:
“Gëzuar e me fat Kurban Bajramin për të gjithë besimtarët myslimanë! Pranë familjes, të afërmve e më të dashurve tanë, e festojmë këtë ditë duke qenë zemërgjerë e duke shtuar solidaritetin.”
Kryeministri theksoi se kjo festë është një kujtesë e rëndësishme për nevojën që të japim e të ndajmë me njëri-tjetrin, duke promovuar dashurinë dhe barazinë sociale.
“Ajo është ftesë për secilën e secilin që të angazhohet për barazinë si fill të shoqërisë, ku begatia dhe mirëqenia të jenë për të gjithë,” tha Kurti.
Ai përmbylli urimin e tij me një dëshirë për mbarësi dhe mirëqenie për të gjithë qytetarët:
“Uroj që kjo ditë t’ua gjejë zemrat dhe tryezat të mbushura përplot, dhe paçi mbarësi e mirësi, shëndet e lumturi sot e mot!”
Festa e Kurban Bajramit po kremtohet sot në gjithë Kosovën dhe hapësirat shqiptare, duke sjellë me vete një atmosferë reflektimi, bashkimi dhe ndarje me nevojtarët.
