Kryeministri belg, Bart De Wever, kërkoi mbështetjen e Shteteve të Bashkuara të Amerikës në luftën kundër kontrabandës transnacionale të drogës gjatë një takimi me ministren e Sigurisë Kombëtare të SHBA-së, Kristi Noem, në portin e Antverpit.
De Wever lavdëroi administratën e Presidentit Donald Trump për përpjekjet e saj në luftën kundër trafikut të drogës në Karaibe dhe për targeting-un e karteleve në të gjithë Amerikën. Ai theksoi rëndësinë e bashkëpunimit midis Evropës dhe SHBA-së, duke nënvizuar se “kriminelët e drogës nuk njohin kufij”.
Ministrja Noem konfirmoi se SHBA-ja do të vazhdojë bashkëpunimin me autoritetet belge kundër “organizatave kriminale transnacionale që vrasin popujt tanë dhe helmojnë qytetarët tanë”.
Belgjika – Qendër kyçe e trafikut të drogës në Evropë
Sipas raportit të Agjencisë së Bashkimit Evropian për Drogën për vitin 2025, qyteti port i Antverpit është pika kryesore e trafikut të drogës në Evropë. Në vitin 2023, aty u sekuestrua një rekord prej 116 tonësh kokainë, ndërsa gjatë vitit 2024 sasia e sekuestruar ra për 50% për shkak të rritjes së inspektimeve.
De Wever bëri thirrje për një bashkëpunim më të ngushtë ndërkombëtar dhe përfshirjen e SHBA-së në shkatërrimin e modeleve të biznesit të krimit të organizuar.
Sipas Agjencisë së Bashkimit Evropian për Drogën, në vitin 2023 në Evropë u sekuestruan 419 tonë kokainë, nga të cilat Belgjika kryesoi me 123 tonë, e ndjekur nga Spanja me 118 tonë dhe Holanda me 59 tonë. Këto tre vende me porte të mëdha përbëjnë 72% të sasisë totale të drogës së sekuestruar në Bashkimin Evropian.
