Kryeministri në detyrë i Republikës së Kosovës, Albin Kurti, mori pjesë mbrëmë në organizimin e Lidhjes Qytetare Shqiptaro-Amerikane, në shënim të ditëlindjes së 85-të të ish-kongresistit amerikan, Joseph DioGuardi, dhe të bashkëshortes së tij, Shirley, e cila sivjet feston 75-vjetorin e lindjes.
Në fjalën e tij përshëndetëse, kryeministri Kurti theksoi rolin vendimtar të Joe DioGuardit në avancimin e interesave shqiptare në Shtetet e Bashkuara:
“Çdo shqiptaro-amerikan, pavarësisht pikëpamjeve apo përkatësive politike, e pranon këtë të vërtetë të thjeshtë: Joe DioGuardi luajti një rol qendror në sjelljen e zërit të shqiptarëve në politikën amerikane në një kohë vendimtare për Kosovën. Ai ishte personi që u hap dyert e politikës amerikane shqiptarëve, kur shumë të tjerë nuk dëshironin të dëgjonin për vuajtjet tona në ish-Jugosllavi.”
Kryeministri nënvizoi gjithashtu kontributin e Shirley DioGuardit, e cila ka organizuar seanca dëgjimore në Kongres dhe Senat, ka informuar ligjvënës të pakujdesshëm për gjendjen në Kosovë dhe ka shkruar artikuj të panumërt që pasqyronin luftën për liri dhe drejtësi.
“Së bashku, Joe dhe Shirley lobuan te Presidenti Clinton për të ndaluar gjenocidin në Kosovë, mbrojtën UÇK-në si ushtri çlirimtare, bindën administratën Bush për pavarësinë e Kosovës, dhe deri sot punojnë pa u ndalur në Uashington për të siguruar që përgjegjësia të vendoset aty ku i takon – mbi ata që minojnë paqen dhe sigurinë,” shtoi Kurti.
Kryeministri uroi të dy për ditëlindjet dhe u dëshiroi shëndet dhe gëzim, duke shprehur mirënjohjen e thellë për Bordin e Lidhjes Qytetare Shqiptaro-Amerikane:
“Në emër të popullit të Kosovës, përkulem me mirënjohje. Ju jeni pjesë e historisë sonë, formësuat lirinë tonë dhe do të mbeteni përgjithmonë pjesë e së ardhmes sonë.”
Ngjarjes i pranishëm ishte edhe zëvendësministrja e Punëve të Jashtme dhe Diasporës, Liza Gashi, si dhe konsulli i përgjithshëm i Kosovës në New York, Blerim Reka, të cilët shoqëruan kryeministrin Kurti gjatë ceremonisë.
