Kryeministri në detyrë i Republikës së Kosovës, Albin Kurti, ka vizituar sot familjen e zjarrfikësit Sefadin Osmanaj në 1-vjetorin e rënies së tij në krye të detyrës. Në këtë vizitë përkujtimore, kryeministri ishte i shoqëruar nga ministri në detyrë i Punëve të Brendshme, Xhelal Sveçla, si dhe nga drejtori ekzekutiv i Agjencisë së Menaxhimit të Emergjencave, Genc Metaj.
Në shtëpinë e familjes Osmanaj në Vitomiricë të Pejës, ata u pritën nga babai i të ndjerit, Shaban Osmanaj, bashkëshortja Gjejrane dhe dy djemtë, Erjoni dhe Edi. Përveç vizitës në familje, delegacioni qeveritar vendosi lule të freskëta pranë varrit dhe përmendores së Sefadin Osmanajt në Trubuhoc të komunës së Istogut.
Kryeministri Kurti vlerësoi lartë sakrificën dhe përkushtimin e Osmanajt, duke theksuar se figura e tij do të kujtohet me mirënjohje të thellë si simbol i guximit dhe përkushtimit ndaj detyrës. Ai nënvizoi se heroizmi i zjarrfikësve si Osmanaj është një shtyllë themelore e sigurisë dhe mirëqenies së qytetarëve.
Zjarrfikësi Sefadin Osmanaj humbi jetën një vit më parë gjatë kryerjes së detyrës, duke dhënë shembullin më të lartë të profesionalizmit dhe sakrificës në shërbim të komunitetit.
