Kryeministri në detyrë i Republikës së Kosovës, Albin Kurti, ka pritur sot në ndërtesën e Qeverisë një delegacion nga shteti amerikan i Iowa-s, i përbërë nga akademikë, ndërmarrës dhe ushtarakë, nën udhëheqjen e Gjeneralmajorit në pension, Timothy Orr, dhe Kryetares së qytetit Johnston, Paula Dierenfeld.
Në këtë takim miqësor dhe përmbajtësor, kryeministri Kurti uroi mirëseardhjen përfaqësuesve të Iowa-s, duke vlerësuar marrëdhëniet e shkëlqyera ndërmjet Kosovës dhe këtij shteti amerikan, që sipas tij, janë shembull i bashkëpunimit afatgjatë dhe të suksesshëm.
“Jam thellësisht mirënjohës për mbështetjen e vazhdueshme të shtetit të Iowa-s që nga ditët e para të çlirimit e deri më sot. Ky partneritet është dëshmi e vërtetë e miqësisë sonë me Shtetet e Bashkuara të Amerikës,” tha Kurti gjatë takimit.
Ai veçoi kontributin e Gjeneralit Timothy Orr, i cili 14 vite më parë kishte nisur programin e bashkëpunimit ushtarak me Kosovën. Kurti e quajti vizionare nismën e tij “E gjithë Iowa për të gjithë Kosovën”, pjesë e Bashkëpunimit Civil, duke theksuar se ajo ka sjellë përfitime të shumta në konsolidimin demokratik dhe zhvillimin ekonomik të vendit.
“Ky program është shembull se si bashkëpunimi ushtarako-civil mund të ndihmojë realisht në ndërtimin e një demokracie funksionale, përparim ekonomik dhe forcim të sundimit të ligjit,” theksoi ai.
Gjatë takimit, u diskutua për thellimin e bashkëpunimit në fushat e mbrojtjes, arsimit dhe qeverisjes lokale, me theks të veçantë në avancimin e shkëmbimeve profesionale dhe zhvillimin institucional.
Në emër të delegacionit amerikan, Gjeneral Orr dhe Kryetarja Dierenfeld falënderuan Qeverinë e Kosovës për mikpritjen dhe bashkëpunimin e frytshëm, duke theksuar se partneriteti me Kosovën do të mbetet një prioritet i veçantë për Iowa-n.
Në takim morën pjesë edhe ministri në detyrë i Mbrojtjes, Ejup Maqedonci, si dhe zëvendësministrja në detyrë e Punëve të Jashtme dhe Diasporës, Liza Gashi.
