Kryeministri në detyrë i Republikës së Kosovës, Albin Kurti, sot paradite ka mirëpritur në takim Komisionerin e Lartë të OSBE-së për Pakicat Kombëtare, Christophe Kamp, i cili po zhvillon vizitën e tij të parë në Kosovë pas emërimit në këtë post në dhjetor 2024.
Gjatë takimit, kryeministri Kurti falënderoi Komisionerin Kamp për angazhimin e gjatë të OSBE-së në Kosovë, duke theksuar kontributin e organizatës në fushën e të drejtave të njeriut, demokratizimit dhe sigurisë. Ai vuri në pah përparimin e Kosovës si një ndër demokracitë më të avancuara në Ballkanin Perëndimor, si dhe përkushtimin e Qeverisë ndaj zhvillimit ekonomik, mirëqenies sociale dhe sigurisë.
Kurti nënvizoi gjithashtu kornizën kushtetuese dhe ligjore të Republikës së Kosovës, që garanton të drejta dhe përfaqësim për komunitetet, përtej standardeve ndërkombëtare. Ai theksoi rëndësinë që këto të drejta të shfrytëzohen për integrim të plotë të komuniteteve në shoqëri.
Kryeministri shprehu gatishmërinë e Qeverisë së Kosovës për të forcuar bashkëpunimin me OSBE-në në fushat e përbashkëta me interes të ndërsjellë.
Në këtë takim ishte i pranishëm edhe ambasadori i Kosovës në Holandë, Dren Doli.
