Kryeministri i Kosovës, Albin Kurti, ka pritur në takim drejtoren e NATO-s për Operacione, Charlotte Hallengren, me të cilën ka diskutuar për thellimin e bashkëpunimit në fushën e sigurisë dhe mbrojtjes.
Gjatë takimit, Kurti shprehu mirënjohje për rolin e NATO në ruajtjen e paqes dhe stabilitetit, si dhe për kontributin e Ekipit Këshillues dhe Ndërlidhës të NATO-s (NALT) në mbështetje të Ministrisë së Mbrojtjes së Kosovës.
Në fokus të bisedimeve ishte avancimi i kapaciteteve të Forca e Sigurisë së Kosovës, përmes trajnimeve profesionale dhe edukative në institucionet e NATO-s, me synim përafrimin me standardet e aleancës.
Kryeministri theksoi se FSK ka dëshmuar performancë të lartë në misione ndërkombëtare, duke përmendur angazhimet në Kuvajt, Belize, Ishujt Falkland dhe Turqi. Ai bëri të ditur se aktualisht po përgatitet edhe për një mision në Gaza, në kuadër të forcave ndërkombëtare stabilizuese, si dhe për trajnime në deminim dhe operacione kërkim-shpëtimi për personelin ukrainas.
Kurti ritheksoi se Kosova mbetet e përkushtuar në rrugën drejt integrimit në NATO, duke e konsideruar këtë si objektiv strategjik të vendit.
Nga ana e saj, Hallengren vlerësoi bashkëpunimin e ngushtë me institucionet e Kosovës dhe përshëndeti vendimin për përfshirjen e FSK-së në misione ndërkombëtare, duke e cilësuar atë si hap të rëndësishëm drejt forcimit të rolit të Kosovës në sigurinë globale.
