Kryeministri në detyrë i Republikës së Kosovës, Albin Kurti, priti sot në takim lamtumirës ambasadorin e Gjermanisë në Kosovë, Jorn Rohde.
Gjatë takimit, kryeministri Kurti shprehu mirënjohjen për pesë vite shërbimi të ambasadorit Rohde në vend, duke theksuar se ai është ambasadori që ka qëndruar më gjatë në këtë detyrë në Kosovë.
“Kosova e vlerëson lartë kontributin tuaj për forcimin e marrëdhënieve tona bilaterale dhe për mbështetjen e vazhdueshme në rrugën tonë drejt integrimit evropian”, tha kryeministri Kurti.
Ai shtoi se Gjermania mbetet partner kyç i Kosovës në bashkëpunim ekonomik dhe veçoi bashkëpunimin në fusha si energjia, arsimi dhe mbrojtja e mjedisit. Në bisedë u trajtuan gjithashtu çështje të sigurisë, bashkëpunimi me KFOR-in, si dhe liberalizimi i vizave për qytetarët e Kosovës, arritje e përbashkët gjatë mandatit të ambasadorit Rohde.
Në përfundim të takimit, kryeministri i uroi ambasadorit shëndet dhe fat në jetën e tij personale dhe profesionale.
