Rrëzë kodrës së Kalasë së Prizrenit dhe pranë ujërave të lumit Lumbardh, në një atmosferë magjike kulturore, është hapur zyrtarisht edicioni i 24-të i Festivalit Ndërkombëtar të Filmit Dokumentar dhe të Shkurtër, DokuFest. Ceremonia e hapjes u zhvillua në praninë e qindra dashamirëve të kinemasë, artistëve vendas dhe ndërkombëtarë, përfaqësuesve të institucioneve dhe publikut të gjerë.
Festivali, i cili do të zgjasë për nëntë ditë rresht, do të ofrojë një program të pasur me mbi 100 filma nga rreth 50 vende të botës, të ndarë në shtatë kategori garuese. Tetë kinematë e qytetit të Prizrenit do të shndërrohen në qendra të vërteta arti dhe reflektimi shoqëror, ku vizitorët do të kenë mundësi të përjetojnë përvojën unike të DokuFest-it.
Kryeministri në detyrë, Albin Kurti, i cili mori pjesë në ceremoninë e hapjes, theksoi rëndësinë shumëdimensionale të këtij festivali për Kosovën. “DokuFest-i është një motor zhvillimi kulturor, ekonomik dhe lokal. Ai ka dëshmuar qëndrueshmëri artistike dhe sociale, duke ndikuar në përfshirjen e kinematografisë edhe në programe shkollore, çka ka ndihmuar në rritjen e potencialit të filmbërësve të rinj,” deklaroi Kurti.
Sipas tij, përkrahja institucionale për ngjarje të tilla është rritur ndjeshëm pas reformave kulturore të ndërmarra nga viti 2022. “Mbështetja shtetërore për DokuFest-in në katër vitet e fundit ka qenë më e madhja ndonjëherë, duke reflektuar rëndësinë që i jepet kulturës si faktor zhvillimi,” shtoi ai.
Kryeministri falënderoi të gjithë organizatorët dhe vullnetarët për përkushtimin e tyre dhe ftoi qytetarët dhe vizitorët që të bëhen pjesë e kësaj ngjarjeje që i jep frymë dhe identitet qytetit të Prizrenit çdo verë.
