Në kuadër të thellimit të bashkëpunimit ndërmjet Kosovës dhe Shteteve të Bashkuara të Amerikës, kryeministri në detyrë Albin Kurti ka pritur në një takim zëvendësndihmës Sekretarin amerikan të Mbrojtjes, David Baker, bashkë me ekipin e tij.
Në njoftimin e bërë nga kreu i ekzekutivit, thuhet se gjatë takimit u diskutua për marrëdhëniet bilaterale ndërmjet dy vendeve dhe bashkëpunimin në fushën e mbrojtjes, që sipas Kurtit do të vazhdojë të thellohet edhe më tej.
“Duke qenë gjithmonë mirënjohës për mbështetjen e vazhdueshme të SHBA-ve ndaj Republikës dhe popullit tonë, angazhohemi çdo ditë për një miqësi më të thellë, një partneritet më të gjerë dhe një aleancë më të fortë,” theksoi Kurti.
Në këtë takim ishin të pranishëm edhe ministri i Mbrojtjes, Ejup Maqedonci, si dhe drejtori i Agjencisë së Kosovës për Inteligjencë, Petrit Ajeti. Vizita e zyrtarit të lartë amerikan vjen në një javë që është shënuar nga zhvillime të rëndësishme në raportet Kosovë–SHBA.
