Kryetari i Kuvendit të Republikës së Kosovës, Dimal Basha, priti sot në takim Ambasadorin e Mbretërisë së Bashkuar në Kosovë, Jonathan Hargreaves.
Gjatë takimit, kryeparlamentari Basha falënderoi ambasadorin për mbështetjen e vazhdueshme të Mbretërisë së Bashkuar ndaj Kosovës, duke theksuar rolin e rëndësishëm të këtij vendi gjatë luftës, si dhe ndihmën e tij në fuqizimin e shtetit, ekonomisë dhe institucioneve demokratike.
Në bisedë u diskutua për zhvillimet e fundit politike në Kosovë, me theks të veçantë mbi procesin e seancës konstituive të Kuvendit. Kryetari Basha nënvizoi përkushtimin e institucioneve të vendit për të mbrojtur interesat dhe të drejtat e të gjithë qytetarëve, duke theksuar vendosmërinë e Kosovës për të avancuar drejt integrimit evropian dhe anëtarësimit në NATO.
Nga ana e tij, Ambasadori Hargreaves e uroi kryeparlamentarin për marrjen e detyrës dhe shprehu gatishmërinë për të intensifikuar bashkëpunimin mes Mbretërisë së Bashkuar dhe Kosovës, sidomos në forcimin e rolit të Kuvendit dhe rritjen e bashkëpunimit me qytetarët.
Takimi u zhvillua në frymë miqësie dhe bashkëpunimi, duke riafirmuar partneritetin e fortë ndërmjet Republikës së Kosovës dhe Mbretërisë së Bashkuar.
