Kryetari i Kuvendit të Republikës së Kosovës, Dimal Basha, mirëpriti sot Ambasadorin e Republikës së Sllovenisë në Kosovë, Borut Blaj, së bashku me Zëvendësambasadoren Milena Radenkovic.
Gjatë takimit, Kryetari Basha e uroi Ambasadorin Blaj për pozicionin e ri dhe i dëshiroi mirëseardhje në Kosovë, duke theksuar rëndësinë e marrëdhënieve bilaterale dhe bashkëpunimit mes dy shteteve. Ai falënderoi gjithashtu popullin dhe qeverinë sllovene për mbështetjen e vazhdueshme ndaj Kosovës.
Basha informoi ambasadorin për konstituimin e Kuvendit dhe për rëndësinë e funksionalizimit të institucioneve të tjera, duke kërkuar mbështetje nga Sllovenia për anëtarësimin e Kosovës në Këshillin e Evropës dhe për marrjen e statusit të kandidatit për Bashkimin Evropian. Ai theksoi gjithashtu domosdoshmërinë e heqjes së masave që pengojnë zhvillimin dhe avancimin e vendit në arenën ndërkombëtare.
Në këtë takim u diskutua edhe bashkëpunimi ndërparlamentar. Kryetari Basha dhe Ambasadori Blaj ranë dakord që ky bashkëpunim të intensifikohet dhe të fokusohet në avancimin e çështjeve të përbashkëta, veçanërisht në fushat e integrimit evropian dhe zhvillimit ekonomik.
Nga ana e tij, Ambasadori Blaj rikonfirmoi përkushtimin e Sllovenisë për mbështetje të vazhdueshme ndaj Kosovës dhe për avancimin e procesit të integrimit evropian, si dhe për rritjen e bashkëpunimit rajonal.
