Kryetari i Nismës Socialdemokrate, Fatmir Limaj, deklaroi në emisionin “Click” në RTV21 se për partinë e tij çështja e mandatarit nga Lëvizja Vetëvendosje është e mbyllur dhe qëndrimet e Nismës janë bërë të qarta në takimin me Presidenten e Kosovës, Vjosa Osmani.
Sipas Limajt, pas zhvillimeve të fundit politike, pozicionet e partive janë më të qarta se kurrë, dhe nuk ekziston asnjë mundësi reale për krijimin e një shumice parlamentare në këtë fazë.
“Besoj se qëndrimet tona i kemi bërë publike aty ku duhet – te Presidentja. Pas dështimit të themelimit të qeverisë të dielën e fundit, kemi përgjigjur ftesës së saj dhe i kemi dorëzuar të gjitha njoftimet tona publike,” tha Limaj.
Ai shtoi se, përjashtim bën vetëm partia e parë (Lëvizja Vetëvendosje), e cila ka kërkuar më shumë kohë, megjithatë sipas tij, nuk i ka pasur votat as në fillim dhe as tani.
“Është e pamundur që në situatën aktuale të krijohet një shumicë parlamentare. Presidentja duhet ta ushtrojë detyrën e vet kushtetuese dhe të shpallë zgjedhjet,” përfundoi Limaj.
