Kryetari i Odës Ekonomike të Kosovës, Lulzim Rafuna, ka zhvilluar një takim me Bordin e Zyrës Regullatorë të Energjisë (ZRrE) për të diskutuar shqetësimet e sektorit privat lidhur me procesin e kalimit në tregun e lirë të energjisë elektrike.
Gjatë këtij takimi, Rafuna ka paraqitur qëndrimet dhe kërkesat e bizneseve, duke theksuar nevojën për një shtyrje të zbatimit të vendimit për shtrenjtimin e çmimit të energjisë prej 16.1% për një periudhë të paktën njëvjeçare. Ai e konsideroi këtë periudhë si një fazë tranzitore, që do të lejonte bizneset të përshtaten me kushtet e reja të tregut dhe të mundësonte përgatitjen e infrastrukturës ligjore dhe teknike për funksionimin e plotë të tregut të lirë.
“Edhe pse e kuptojmë nevojën për investime në rrjetin energjetik, mbulimi i kësaj faze të tranzicionit duhet të shoqërohet me mbështetje institucionale. Kjo do të mundësonte shtyrjen e vendimit për daljen në tregun e lirë për bizneset që punësojnë mbi 50 persona ose kanë qarkullim vjetor mbi 10 milionë euro,” tha Rafuna.
Ai theksoi se një shtyrje e këtij vendimi do të ishte në dobi të mbrojtjes së bizneseve vendore, ruajtjes së stabilitetit ekonomik dhe përfitimit të drejtpërdrejtë të qytetarëve të Kosovës.
Njoftimi i Odës Ekonomike për këtë kërkesë theksoi rëndësinë e mbështetjes nga Qeveria e Kosovës gjatë këtij tranzicioni të rëndësishëm për sektorin privat.
