Në Shtime po realizohen investime të rëndësishme infrastrukturore, të financuara si nga Qeveria e Kosovës, ashtu edhe nga Komuna e Shtimes.
Kryeministri Albin Kurti, së bashku me kryetarin e komunës Qemajl Aliu, vizituan fillimisht fshatin Vojnoc, ku nisën punimet për rivitalizimin e rrugës “Ibrahim Shabani”. Rruga, e gjatë dy kilometra dhe e gjerë pesë metra, lidh Shtimen me Ferizajn dhe Lipjanin, ndërsa investimi kap vlerën e rreth 420 mijë eurove, të financuara nga Ministria e Mjedisit, Planifikimit Hapësinor dhe Infrastrukturës.
Më pas, Kurti dhe Aliu përuruan trasenë e re që lidh rrugën “12 Qershori” me “William Walker”, pjesë e unazës së vogël të qytetit. Ky projekt, me vlerë gati gjysmë milioni euro, përfshin një segment prej 375 metrash të gjatë dhe gjashtë metra të gjerë, i pajisur me kanalizim atmosferik, ndriçim publik dhe trotuare në të dyja anët.
Kryeministri Kurti falënderoi për mikpritjen dhe përgëzoi për punët e kryera, duke uruar që këto projekte të shërbejnë drejtpërdrejt qytetarëve të Shtimes.
