Kryeministri në detyrë dhe lideri i Lëvizjes Vetëvendosje, Albin Kurti, ka akuzuar partitë opozitare për thellimin e krizës politike në Kosovë, duke i cilësuar si përgjegjëse për bllokimin e formimit të institucioneve të reja pas zgjedhjeve të 9 shkurtit.
Në një deklaratë të mbajtur gjatë nominimit të Hajrulla Çekut si kandidat për kryetar të Prishtinës nga LVV, Kurti tha se “destruktiviteti opozitar” buron nga xhelozia dhe mospranimi i rezultatit zgjedhor. “Nuk po shtyhen, nuk po ngrihen. Po e sabotojnë shtetin sepse nuk mund ta përtypin humbjen,” tha Kurti.
Që prej zgjedhjeve, tashmë gati gjashtë muaj më parë, Kosova vazhdon të mbetet pa institucione të reja. Mosmarrëveshjet mes partive kanë çuar edhe në ndërhyrjen e Gjykatës Kushtetuese, e cila më 27 korrik ka vendosur një masë të përkohshme për të pezulluar afatet e mëtejshme deri më 8 gusht, pas dështimit për konstituimin e legjislaturës së nëntë.
Kurti rikujtoi se ka dërguar dy herë ftesë për bashkëqeverisje ndaj LDK-së, por kjo e fundit ka refuzuar. Po ashtu, edhe negociatat me Nismën Socialdemokrate të Fatmir Limajt nuk kanë rezultuar me marrëveshje, për shkak të kërkesës së kësaj partie për të marrë postin e kryetarit të Kuvendit.
Ndërkohë, kandidati i LVV-së për kryetar të Prishtinës, Hajrulla Çeku, u shpreh se Vetëvendosje është e vetmja forcë politike që ofron një vizion të qartë dhe transformues për kryeqytetin. Ai paralajmëroi se shumë shpejt do të prezantojë platformën e plotë qeverisëse “Prishtina 2035”.
Kriza politike në vend pritet të intensifikohet në ditët në vijim nëse nuk arrihet ndonjë marrëveshje mes partive për formimin e institucioneve.
