Kryeministri në detyrë dhe njëherësh kryetari i Lëvizjes Vetëvendosje, Albin Kurti, ka ftuar për një takim kryetarin e Lidhjes Demokratike të Kosovës (LDK), Lumir Abdixhikun, dhe atë të Partisë Demokratike të Kosovës (PDK), Memli Krasniqin. Takimi është paraparë të mbahet të enjten, më 1 maj 2025, në orën 08:30 në sallën N-204 të Kuvendit të Kosovës.
Ftesa e Kurtit vjen pas dështimit të gjashtë tentimeve për zgjedhjen e Albulena Haxhiut si kryetare e Kuvendit, për çka tani po synohet arritja e një konsensusi për formimin e institucioneve të reja.
“Duke u bazuar në Kushtetutë, tre nënkryetarë do të jenë nga tri partitë që fituan më së shumti ulëse, andaj ju ftoj për një takim të përbashkët edhe me z. Memli Krasniqi, kryetarin e PDK-së, në sallën N-204 të Kuvendit të Republikës së Kosovës, nesër (e enjte), 1 maj 2025, në orën 08:30. Me shpresë në përgjigje pozitive, ju përshëndes”, thuhet në letrën e dërguar nga Kurti.
Nuk dihet ende nëse dy liderët opozitarë do ta pranojnë ftesën. Kujtojmë se më 8 prill 2025, Lumir Abdixhiku e kishte refuzuar një ftesë të mëparshme të Kurtit, duke deklaruar se gjuha e përdorur nga Kurti gjatë dhe pas fushatës ishte e papranueshme për të dhe për LDK-në.
“Sado që unë dhe LDK nuk udhëhiqemi nga inati; sado që ne besojmë në dialog, bashkëpunim e komunikim njerëzor e politik; një takim i tillë – madje edhe konsultativ – do të ishte kapërcim fatal i dinjitetit njerëzor dhe politik”, kishte deklaruar Abdixhiku në letrën e tij publike.
Ndërkohë, kreu i PDK-së, Memli Krasniqi, nuk kishte qenë i ftuar në takimin paraprak. Lidhur me këtë, Glauk Konjufca kishte deklaruar se ftesa ndaj LDK-së tregonte qartë se kë preferonte më shumë VV dhe se nuk kishte qenë një ftesë e rastësishme.
Rreth këtij takimi dhe përgjigjes së mundshme nga LDK dhe PDK pritet të ketë zhvillime gjatë ditës së nesërme.
