Kryeministri në detyrë, Albin Kurti, ka deklaruar se është i gatshëm dhe ka interes për bashkëpunim me opozitën, por ka theksuar se mbetet të shihet nëse kjo gatishmëri është reciproke. Sipas tij, muaji shkurt do të tregojë nëse në Kuvend ekziston atmosfera për një raport të ri Qeveri–Opozitë.
Kurti i bëri këto deklarata para mediave gjatë një vizite në Odën e Mjekëve të Kosovës, ku theksoi se bashkëpunimi me opozitën është i domosdoshëm, veçanërisht për çështjet që kërkojnë dy të tretat e votave në Kuvend, si marrëveshjet ndërkombëtare dhe zgjedhja e presidentit apo presidentes.
“Ne duhet të shohim në Kuvend nëse ka atmosferë për një raport të ri Qeveri–Opozitë. Nuk mund ta them këtë paraprakisht, por pa dyshim shkurti do të na tregojë nëse mund ta hapim një kapitull të ri të raporteve tona,” tha Kurti, duke shtuar se nga ana e tij dhe e qeverisë që ai drejton, gatishmëria ekziston.
Ai theksoi se populli i ka dhënë një mbështetje të madhe Lëvizja Vetëvendosje, gjë që sipas tij përbën një përgjegjësi të lartë për formimin e qeverisë së re, por se pa bashkëpunim me opozitën nuk mund të ecet përpara në vendimmarrje të rëndësishme.
Sa i përket çështjes së presidentit, Kurti sqaroi se kjo vjen vetëm pasi të kalohen tre hapa paraprakë: certifikimi i rezultateve të zgjedhjeve dhe trajtimi i ankesave, konstituimi i Kuvendit dhe formimi i qeverisë, si dhe miratimi i marrëveshjeve ndërkombëtare. Ai përmendi në veçanti tri marrëveshje me Bankën Botërore dhe Planin e Rritjes së BE-së në vlerë 882.6 milionë euro, ku rreth 30 për qind janë grante dhe 70 për qind kredi.
“Në muajin shkurt do të shohim nëse opozita ka gatishmëri dhe interes për bashkëpunim. Vetëm atëherë do të dihet nëse po nisim një kapitull të ri apo po mbetemi në raportet e vitit 2025,” përfundoi Kurti.
