Kryeministri në detyrë i Republikës së Kosovës, Albin Kurti, mori pjesë sot në konferencën nacionale “Një komunitet pa varësi”, të organizuar nga Zyra për Qeverisje të Mirë në partneritet me Koalicionin e OJQ-ve për Mbrojtjen e Fëmijëve, Trust Circle Foundation dhe organizatën Labyrinth.
Konferenca synoi nxitjen e një dialogu gjithëpërfshirës ndërmjet institucioneve shtetërore, organizatave të shoqërisë civile dhe komunitetit, për të adresuar dhe parandaluar përdorimin e substancave narkotike nga fëmijët dhe të rinjtë.
Në fjalën e tij, Kurti theksoi se Qeveria e Kosovës ka një qasje gjithëpërfshirëse ndaj kësaj sfide, duke u fokusuar te parandalimi, edukimi, ndërgjegjësimi dhe mbështetja psiko-sociale e shëndetësore për përdoruesit e drogave. Ai theksoi se krahas forcimit të Policisë kundër shpërndarjes së narkotikëve, po bëhen edhe investime në qendra trajtimi dhe programe rehabilitimi.
“Kosova synon të ndërtojë një shoqëri më të sigurt dhe më të shëndetshme. Ne po investojmë në programe parandaluese, edukative dhe rehabilituese, me qëllim që të zvogëlojmë dëmin shëndetësor dhe social të varësisë”, tha Kurti.
Kryeministri në detyrë kujtoi mbështetjen konkrete të institucioneve, duke përmendur fondet e ndara nga Ministria e Drejtësisë dhe Ministria e Shëndetësisë për organizatën Labyrinth dhe programet për edukim, vetëdijesim dhe testim për HIV e Hepatit C.
Ai gjithashtu nënvizoi rëndësinë e Strategjisë Shtetërore kundër Drogave 2024–2028, e cila kombinon luftën ndaj zinxhirëve të shpërndarjes së drogave me forcimin e mekanizmave edukativë, sidomos për të rinjtë.
“Varësia nuk mund të bëhet realiteti i hidhur i rrugëve, shkollave apo familjeve tona. Kjo është një betejë që mund ta fitojmë vetëm së bashku: institucionet, policia, komunat, shoqëria civile, mediat, shkollat, prindërit dhe të rinjtë”, u shpreh Kurti.
Ai bëri thirrje për një front të bashkuar dhe të palëkundur kundër varësisë, duke e konsideruar këtë sfidë si një nga betejat më të rëndësishme për të ardhmen e fëmijëve dhe të rinjve të Kosovës.
