Kryeministri në detyrë i Republikës së Kosovës, Albin Kurti, mori pjesë në një diskutim të organizuar nga Hudson Institute në New York me temën “Partneriteti në rritje Kosovë – ShBA në mbrojtje dhe zhvillim”. Në panel ishin të pranishëm Presidenti dhe Drejtori Ekzekutiv i Hudson Institute, John Walters, si dhe hulumtues nga Qendra për Evropë dhe Euroazi dhe Qendra për Paqe dhe Siguri në Lindjen e Mesme.
Hudson Institute, i themeluar në vitin 1961, është një ndër institutet kërkimore më me ndikim në SHBA, që merret me analiza strategjike në fushat e mbrojtjes, marrëdhënieve ndërkombëtare, ekonomisë, energjisë, teknologjisë dhe politikës publike.
Fjalimi i Kurtit: Kosova nga përfitues në kontribues sigurie
Në fjalën e tij, kryeministri Kurti theksoi se partneriteti me ShBA-në është themelor për Kosovën, duke rikujtuar ndërhyrjen e NATO-s në vitin 1999 si moment vendimtar për lirinë e vendit. Ai deklaroi se Kosova sot nuk është më vetëm një shtet pas-konflikti nën mbrojtjen e NATO-s, por një aleat i besuar dhe kontribues aktiv në siguri.
Kurti përmendi stërvitjet e përbashkëta të FSK-së me forcat amerikane, pjesëmarrjen në misione ndërkombëtare dhe modernizimin e ushtrisë përmes blerjes së sistemeve moderne, si Javelin, UAV, ASV, si dhe diskutimet për helikopterët Black Hawk.
“Shpenzimet tona të mbrojtjes janë katërfishuar gjatë mandatit tonë. Kosova ka dëshmuar se është gati të kontribuojë jo vetëm për sigurinë e saj, por edhe për stabilitetin rajonal e global”, tha Kurti.
Diplomacia dhe zhvillimi ekonomik
Përveç mbrojtjes, Kurti u ndal edhe te zhvillimi ekonomik dhe marrëdhëniet tregtare me ShBA-në. Ai përmendi uljen në 0% të tarifave doganore për produktet amerikane, si dhe zbatimin e Programit Kompakt të MCC, granti më i madh amerikan në Kosovë, me vlerë mbi 200 milionë dollarë.
Gjithashtu, kryeministri në detyrë përmendi përfundimin e modernizimit të njësisë së parë të termocentralit Kosova B nga kompania General Electric, si një projekt që lidhet me sigurinë energjetike afatgjatë të vendit.
Mesazhi për rajonin dhe rolin e Kosovës
Në lidhje me situatën rajonale, Kurti kritikoi ndikimin rus dhe politikat destabilizuese të Serbisë, duke theksuar se Kosova mbetet vijë e parë mbrojtëse kundër ndikimit keqdashës në Ballkanin Perëndimor.
“Kosova nuk kërkon të shihet vetëm si përfituese e mbështetjes së ShBA-së dhe NATO-s, por si një aleate e palëkundur, kontribuese në siguri dhe zhvillim”, deklaroi ai, duke shtuar se Kosova dhe ShBA-të janë të bashkuara jo vetëm në fjalë, por edhe në veprime konkrete.
