Kryeministri i Kosovës, Albin Kurti, gjatë qëndrimit të tij në Paris në kuadër të Forumit të Paqes, mori pjesë në një diskutim të organizuar nga Instituti francez Jacques Delors, një nga think-tankët më të njohur në fushën e politikave evropiane.
Në këtë tryezë, ku morën pjesë diplomatë, studiues dhe përfaqësues politikë, tema kryesore ishte situata gjeopolitike në Evropë dhe roli i Ballkanit Perëndimor në zhvillimet aktuale. Kurti tha se pa integrimin e rajonit në Bashkimin Evropian, kontinenti nuk mund të jetë as plotësisht i sigurt, as ekonomikisht i qëndrueshëm.
“Anëtarësimi i Ballkanit Perëndimor në Bashkimin Evropian është në interesin ekonomik dhe të sigurisë së vetë BE-së dhe shteteve anëtare të saj,” – theksoi Kurti gjatë fjalës së tij.
Diskutimi përfshiu edhe çështje që lidhen me mbrojtjen, të drejtat e njeriut dhe trajtimin e pakicave, si dhe zhvillimet e fundit politike në Kosovë dhe rajon. Në debat mori pjesë edhe René Troccaz, i dërguari i posaçëm i Ministrisë së Punëve të Jashtme të Francës për Ballkanin Perëndimor.
Në mbrëmje, Kurti ishte i pranishëm në darkën e shtruar nga Qarku Diplomatik i Parisit, ku foli për rëndësinë e solidaritetit dhe bashkëpunimit ndërmjet shteteve evropiane, duke theksuar se bashkimi i vlerave evropiane me interesat shtetërore është thelbësor për një Evropë më të bashkuar e më të drejtë.
Ky është një tjetër aktivitet në serinë e takimeve ndërkombëtare që Kurti po zhvillon për të forcuar pozitën ndërkombëtare të Kosovës dhe për të thelluar bashkëpunimin me partnerët evropianë.
