Kryeministri në detyrë i Republikës së Kosovës, Albin Kurti, ishte sonte i pranishëm në pritjen zyrtare të organizuar nga ambasada e Finlandës në Kosovë, me rastin e Ditës së Pavarësisë së këtij shteti nordik.
Në fjalën e tij, Kurti e përshkroi Finlandën si një shtet shembull për Kosovën – një vend që kombinon sigurinë me mirëqenien sociale, pa i vënë njërën përballë tjetrës. “Si ne, Finlanda e njeh rëndësinë e mirëqenies sociale. Dhe, ashtu si Kosova, ajo nuk zgjedh sigurinë mbi mirëqenien – i përqafon të dyja,” tha Kurti para të ftuarve.
Ai vlerësoi po ashtu pozicionimin e qartë dhe parimor të Finlandës në skenën ndërkombëtare, sidomos mbështetjen e saj të palëkundur për Ukrainën në përballje me agresionin rus. Kurti theksoi se prej vitit 2022 Finlanda ka dhënë 3.9 miliardë euro ndihmë për Ukrainën, çka sipas tij dëshmon përkushtimin e thellë ndaj paqes, sigurisë dhe vlerave evropiane.
“Finlanda është e përkushtuar ndaj sigurisë së saj – ashtu si ne,” shtoi Kurti, duke nënvizuar se Kosova dhe Finlanda ndajmë të njëjtat parime dhe ambicie për zhvillim, stabilitet dhe orientim euroatlantik.
Pritja u zhvillua në atmosferë miqësore, ndërsa mesazhi i Kurtit vuri në pah marrëdhënien e qëndrueshme dhe partneritetin mes Kosovës dhe Finlandës.
