Kryeministri në detyrë i Republikës së Kosovës, Albin Kurti, i shoqëruar nga zëvendësministrja në detyrë e Kulturës, Rinisë dhe Sportit, Daulina Osmani, si dhe deputetë të Kuvendit, mori pjesë në edicionin e tretë të Ulpiana Fest, i cili u mbajt mbrëmë në ambientet e Parkut Arkeologjik Ulpiana.
Në fjalën e tij, Kurti theksoi rëndësinë historike të lokalitetit, duke rikujtuar gjetjet e fundit të ekipit të arkeologëve nga Kosova dhe Franca, që dëshmojnë themelimin e qytetit Justiniana Secunda si qytet dardan, si dhe rolin e Ulpianës në antikitetin e vonë dhe mesjetën e hershme.
“Këto pasuri të jashtëzakonshme arkeologjike tashmë janë në pronësi publike, u përkasin të gjithëve dhe na bashkojnë si vlerë e përbashkët e universale. Ato do të mundësojnë hulumtime të mëtutjeshme dhe ruajtjen e tyre për brezat e ardhshëm”, tha kryeministri Kurti.
Ai vlerësoi bashkëpunimin shumëvjeçar mes Kosovës dhe Francës në mbrojtjen e trashëgimisë kulturore, duke shprehur mirënjohje për kontributin e profesorëve dhe arkeologëve francezë. Në këtë kuadër, Kurti ndau mirënjohje për Prof. Dr. Jean-Luc Lamboley, për rolin e tij të rëndësishëm në arkeologjinë dhe trashëgiminë kulturore të Kosovës. Mirënjohja u pranua nga arkeologu francez Christophe Goddard, në mungesë të profesorit.
Për dy ditë me radhë, vizitorët e festivalit patën mundësinë të shijojnë trashëgiminë e Dardanisë përmes punëtorive krijuese, lojërave tradicionale, ushqimit vendor dhe shfaqjeve artistike, duke e kthyer Ulpianën në një hapësirë të gjallë kulturore dhe historike.
