Kryeministri i Kosovës, Albin Kurti, ka njoftuar përmes një postimi në Facebook se pasaporta e Republikës së Kosovës është renditur më e fuqishme se kurrë më parë në raportin vjetor të Indeksit të Pasaportave Henley.
Sipas Kurtit, Kosova ka shënuar një ngritje të dukshme, duke kaluar nga vendi i 108-të në vitin 2021, në vendin e 65-të në raportin e vitit 2025. Edhe në krahasim me vitin e kaluar, vendi ka përparuar, duke u ngjitur nga pozita e 68-të në raportin përfundimtar të këtij viti.
“Përveçse është rezultati më i mirë ndonjëherë në këtë indeks vjetor dhe dëshmi e forcimit të shtetësisë sonë, ky rankim është tregues edhe i angazhimit tonë si qeveri në këtë mandat: nga liberalizimi i vizave me zonën Shengen e deri te puna intensive diplomatike me shumë shtete anekënd botës për të mundësuar lëvizjen e lirë”, ka shkruar Kurti.
Kryeministri theksoi se pasaporta e Kosovës po fiton gjithnjë e më shumë njohje ndërkombëtare, duke u bërë simbol i përfaqësimit dinjitoz të qytetarëve dhe i fuqizimit të Republikës së Kosovës.
“Me pasaportën tonë, e cila po bëhet më e njohur ndërkombëtarisht, përfaqësohemi dinjitetshëm, udhëtojmë në më shumë vende pa viza dhe fuqizojmë republikën tonë,” përfundoi Kurti.
