Kryeministri i Kosovës, Albin Kurti, ka reaguar pas lajmit për njohjen zyrtare të Republikës së Kosovës nga Republika Arabe e Sirisë, duke e cilësuar këtë si një tjetër sukses diplomatik të rëndësishëm për vendin.
Në një postim në Facebook, Kurti shkroi se Siria është shteti i tretë që njeh Kosovën gjatë këtij viti, pas Kenias dhe Sudanit, duke theksuar se këto zhvillime përfaqësojnë tri partneritete të reja dhe tri fitore për diplomacinë kosovare.
“Pas Kenias dhe Sudanit, Siria bëhet shteti i radhës që njeh Kosovën brenda këtij viti. Tri njohje dhe tri partneritete të reja më shumë për vendin tonë,” — ka shkruar Kurti.
Kryeministri ka shprehur mirënjohje për përpjekjet e Presidentes Vjosa Osmani dhe për mbështetjen e Mbretërisë së Arabisë Saudite, e cila ndërmjetësoi marrëveshjen historike për njohjen nga Siria.
“I jemi mirënjohës përpjekjeve të suksesshme të Presidentes sonë dhe mbështetjes së Arabisë Saudite si shtet mik e partner i Republikës sonë,” — theksoi ai.
Kurti shtoi se ky moment duhet të shërbejë si pikënisje për ndërtimin e marrëdhënieve bilaterale dhe partneriteteve afatgjata ndërmjet Kosovës dhe Sirisë.
“Nga sot angazhohemi që lidhjet mes nesh të fuqizohen, duke ngritur marrëdhënie me interesa të përbashkëta dhe partneritete të qëndrueshme,” — përfundoi ai.
Njohja nga Siria e çon numrin e shteteve që kanë njohur pavarësinë e Kosovës në 120, duke forcuar pozitën ndërkombëtare të vendit në skenën diplomatike.
