Kryeministri në detyrë i Republikës së Kosovës, Albin Kurti, ka zhvilluar një takim bilateral me Kryeministrin e Granadës, Dickon Amiss Thomas Mitchell, në Konsullatën e Përgjithshme të Kosovës në New York. Ky është takimi i dytë mes tyre brenda dy viteve të fundit.
Kurti shprehu mirënjohjen për mbështetjen e vazhdueshme që Qeveria e Granadës i ka dhënë Kosovës, veçanërisht në proceset e anëtarësimit në organizata ndërkombëtare.
Të dy kryeministrat diskutuan për marrëdhëniet dypalëshe, mundësitë e zgjerimit të bashkëpunimit dhe forcimit të partneritetit, si dhe për zhvillimet gjeopolitike dhe ndikimet e tyre në rajon e më gjerë.
Me këtë rast, Kurti e ftoi homologun e tij nga Granada për një vizitë zyrtare në Kosovë, në mënyrë që të konkretizohet më tej vullneti i dy vendeve për bashkëpunim.
Në takim morën pjesë edhe zëvendësministrja në detyrë e Punëve të Jashtme dhe Diasporës, Liza Gashi, si dhe konsulli i përgjithshëm i Kosovës në New York, ambasadori Blerim Reka.
