Kryeministri i Kosovës, Albin Kurti, ka vlerësuar lartë pjesëmarrjen dhe performancën e Forcës së Sigurisë së Kosovës (FSK) në ushtrimin ndërkombëtar “Defender Europe 25”, i cili po zhvillohet aktualisht në territorin e Republikës së Kosovës.
Në një vizitë të realizuar sot bashkë me ministrin e Mbrojtjes, Ejup Maqedonci, dhe Komandantin e FSK-së, Gjenerallejtënant Bashkim Jashari, Kurti tha se Ushtria e Kosovës po dëshmon çdo ditë aftësi të shkëlqyera të ndërveprimit me ushtritë e vendeve të NATO-s.
Vizita nisi në komandën e Divizionit 28 të këmbësorisë së Ushtrisë së Shteteve të Bashkuara të Amerikës, e cila aktualisht udhëheq brigadat shumëkombëshe që veprojnë në regjionin e Europës Juglindore. Më pas, delegacioni qeveritar vizitoi Devën, ku u takuan me trupat e Forcës për Detyrë – një batalion shumëkombësh nën drejtimin e Regjimentit të Dytë të Këmbësorisë së FSK-së.
Në fund të vizitës, ata ndaluan edhe në poligonin për qitje me armë të lehta, të cilin Shtetet e Bashkuara të Amerikës e kanë dhuruar si donacion për ushtrinë e Kosovës.
Gjatë ditës, zyrtarët patën gjithashtu mundësinë të shohin nga afër edhe investimet infrastrukturore që janë duke u zhvilluar në zonën kryesore të trajnimit në Babaj të Bokës – një hapësirë kyçe për ngritjen profesionale dhe operacionale të FSK-së.
Kurti theksoi se përkushtimi për ndërtimin e një ushtrie profesionale dhe të aftë është duke dhënë rezultate konkrete dhe se pjesëmarrja aktive në stërvitjet ndërkombëtare si “Defender Europe 25” është dëshmi e rritjes së besueshmërisë dhe kapaciteteve të FSK-së në nivel ndërkombëtar.
