Albin Kurti ka njoftuar se kabineti qeveritar ka nisur një takim dyditor pune, me qëllim që zotimet e bëra gjatë fushatës zgjedhore të dhjetorit 2025 të përkthehen në program konkret qeverisës.
Në një reagim publik, Kurti tha se qytetarët i dhanë qeverisë së tij një besim të madh në zgjedhjet e fundit, duke shtuar se ky besim duhet të kthehet në siguri dhe mirëqenie për vendin.
Sipas tij, qeveria nuk ka garuar me premtime të përkohshme, por me zotime që synojnë të realizohen gjatë mandatit.
“Zotimet që u dhanë para qytetarëve dhe ekspozea e prezantuar para deputetëve do të shndërrohen në program qeverisës”, theksoi Kurti.
Fokus në planifikimin e mandatit
Kryeministri bëri të ditur se gjatë këtij takimi të kabinetit do të punohet për:
-
përkthimin e zotimeve në projekte konkrete
-
përcaktimin e qëllimeve dhe objektivave strategjike
-
hartimin e planeve operative për këtë mandat qeverisës
Ai theksoi se programi do të mbështetet në projekte dhe masa që do të realizohen në punën e përditshme të institucioneve.
Prioritetet e qeverisë
Kurti nënvizoi se qeverisja e tij do të mbështetet në disa parime kryesore:
-
angazhimi për interesin publik
-
zhvillimi ekonomik dhe barazia sociale
-
integriteti institucional
-
ruajtja e dinjitetit shtetëror të Kosovës.
Sipas tij, këto parime do të mbeten pikënisja dhe synimi i qeverisë gjatë gjithë mandatit.
