Deputetët e rinj të Kuvendit të Kosovës do të mblidhen sërish këtë të hënë, më 2 qershor, në një tjetër përpjekje për të çuar përpara punimet e seancës konstituive. Seanca pritet të nisë në orën 10:30, por pasiguria politike vazhdon të dominojë jetën parlamentare të vendit.
Ashtu si në seancat e kaluara, edhe në atë të shtunën, deputetët nuk arritën konsensus për formimin e një komisioni mbikëqyrës për votimin e fshehtë të kandidatëve për kryetar të Kuvendit – një hap i domosdoshëm për finalizimin e strukturës udhëheqëse të institucionit ligjvënës.
Deri tani, janë miratuar vetëm dy pika të rendit të ditës: raporti i Komisionit të përkohshëm për verifikimin e mandateve dhe betimi i deputetëve të zgjedhur. Pjesa tjetër e agjendës mbetet pezull, ndërsa vendi vijon të funksionojë pa një kryetar parlamenti, më shumë se tre muaj pas mbajtjes së zgjedhjeve parlamentare.
Ngërçi institucional ka shtuar presionin mbi subjektet politike për të gjetur një zgjidhje, ndërkohë që qytetarët dhe organizatat e shoqërisë civile shprehin shqetësimin për mungesën e funksionalitetit të Kuvendit.
