Kuvendi i Shqipërisë ka miratuar pas mesnatës buxhetin e vitit 2026, pas një muaji diskutimesh intensive në komisione. Paketa financiare prej 8.8 miliardë euro u votua me 81 vota pro dhe 16 kundër, duke i hapur rrugë ndryshimeve të rëndësishme në paga, pensione dhe investime publike.
Të gjitha amendimet e propozuara nga deputetët për rritje shtesë të shpenzimeve u rrëzuan. Sipas ministrisë së Ekonomisë, kërkesat shtesë kapnin shifrën 278.9 miliardë lekë, mbi 10% të PBB-së, duke rrezikuar konsolidimin fiskal. Të vetmet shtesa që u miratuan ishin ato të kërkuara nga institucionet gjatë seancave në komisione, ku 12 institucione përfituan 504.9 milionë lekë, kryesisht nga sektori i drejtësisë.
Pensionet rriten, vjen bonusi i përmuajshëm – 100 milionë euro fond
Nga 1 janari 2026 hyn në fuqi formula e re e pensioneve, me bonuse të përmuajshme për pensionistët. Për këtë qëllim janë parashikuar 100 milionë euro, ndërsa 16.5 milionë euro shkojnë për indeksimin vjetor.
Paga minimale rritet në 50 mijë lekë
Nga janari, paga minimale ngjitet nga 40,000 në 50,000 lekë, ndërsa pagat e administratës publike do të indeksohen me 2.5%.
Investime publike rekord – 1.8 miliardë euro në vitin 2026
Investimet publike do të arrijnë në 1.8 miliardë euro, më shumë sesa 1.6 miliardë euro të vitit aktual. Prioritetet kryesore janë:
-
infrastruktura rrugore
-
arsimi
-
energjia dhe shëndetësia
-
forcat e armatosura (angazhimet ndaj NATO-s)
Shëndetësia mban buxhetin më të madh
Ministria e Shëndetësisë përfiton 82.2 miliardë lekë për mbulimin e gjithë sistemit shëndetësor. Gjithashtu:
-
13.5 miliardë lekë për kompensimin e medikamenteve
-
1.5 miliardë lekë për barnat onkologjike
Infrastruktura – 77.2 miliardë lekë për rrugët dhe transportin
Mbi 35 miliardë lekë do të investohen në transportin rrugor, duke mbështetur projektet e reja kombëtare.
Arsimi – 64.8 miliardë lekë
Fokusi kryesor:
-
tekste falas për nxënësit
-
transport falas për nxënës e mësues
-
investime në shkolla dhe universitete
Mbrojtja rrit buxhetin për detyrimet ndaj NATO-s
Ministria e Mbrojtjes përfiton 58.9 miliardë lekë, gati 10 miliardë më shumë se viti i kaluar, duke ndihmuar modernizimin e kapaciteteve të FA.
Ekonomia, rendi dhe bujqësia
-
Ministria e Ekonomisë: 41.7 miliardë lekë
-
Ministria e Brendshme: 35.7 miliardë lekë
-
Bujqësia, sërish ndër më të nënfinancuarat: vetëm 7.6 miliardë lekë për skemat e fermerëve nga 16.2 miliardë lekë total
Të ardhurat, borxhi dhe rritja ekonomike
-
Të ardhurat parashikohen të arrijnë 8.2 miliardë euro, të nxitura nga turizmi dhe administrimi fiskal.
-
Borxhi publik pritet të ngjitet në 14.9 miliardë euro.
-
Rritja ekonomike planifikohet në 4%, e mbështetur nga turizmi dhe ndërtimi.
