Gjermania ka miratuar një reformë të re që hyn në fuqi më 1 janar 2026, e cila u jep pensionistëve mundësinë të punojnë dhe të fitojnë deri në 2,000 euro në muaj pa paguar taksa.
Kjo risi, e quajtur “pension aktiv” (Aktivrente), vlen për të gjithë ata që marrin pension gjerman dhe zgjedhin të vazhdojnë të punojnë, përfshirë edhe pensionistët që jetojnë jashtë Gjermanisë, si në Kosovë, Shqipëri apo vendet e tjera të rajonit.
Sipas ministres së Punës Bärbel Bas, qëllimi i reformës është të mbajë në treg punëtorët me përvojë dhe të lehtësojë mungesën e fuqisë punëtore në disa sektorë.
“Kushdo që dëshiron të punojë më gjatë duhet të ketë kushte tërheqëse,” – tha Bas, duke konfirmuar se do të hiqet ndalimi për rikthimin në vendin e mëparshëm të punës.
Reforma është miratuar pas një takimi të komitetit qeveritar të udhëhequr nga kancelari Friedrich Merz, me pjesëmarrjen e ministrit të Financave Lars Klingbeil, ministres Bas dhe ministrit-president të Bavarisë Markus Söder.
Përveç “pensionit aktiv”, u miratuan edhe ndryshime në Bürgergeld – ndihmën bazë të të ardhurave për personat me të ardhura të ulëta.
Qeveria thotë se këto masa do të:
-
Nxisin drejtësinë sociale dhe përfshirjen e të moshuarve në ekonomi;
-
Ndihmojnë në zbutjen e mungesës së fuqisë punëtore në sektorë si shëndetësia, transporti dhe administrata;
-
Krijojnë kushte më të leverdishme për pensionistët që duan të punojnë me orar të pjesshëm.
Çfarë përfiton pensionisti konkretisht?
Nga viti 2026, çdo pensionist që merr pension nga Gjermania mund të punojë dhe të fitojë deri në 2,000 euro në muaj pa paguar asnjë taksë shtesë.
Kjo shumë mund të kombinohet me pensionin ekzistues, duke mundësuar një rritje reale të të ardhurave mujore.
Si qëndron Gjermania ndaj shteteve të tjera të BE-së?
Ekspertët thonë se kjo është një nga skemat më bujare në Evropë, pasi shumica e shteteve të BE-së aplikojnë vetëm norma më të ulëta tatimi ose bonuse për pensionet e shtyra, si në Suedi dhe Danimarkë.
Megjithatë, mbeten për t’u sqaruar disa detaje, si mënyra e llogaritjes së shumës pa taksa për personat me kontrata të shumëfishta apo mënyra e kontributit në sigurimet shëndetësore.
Ekspertët e tregut të punës e vlerësojnë “Aktivrente”-n si një reformë moderne e domosdoshme, që mund të shërbejë si model për vendet e tjera evropiane për të përballuar mungesën e punëtorëve dhe plakjen e popullsisë.
