Ministri i Jashtëm i Rusisë, Sergei Lavrov, ka reaguar ashpër ndaj vendimit të Gjermanisë dhe aleatëve evropianë për të hequr kufizimet në gamën e armëve që po dërgohen në Ukrainë. Në një deklaratë të fortë, Lavrov akuzoi liderët evropianë se po e minojnë me vetëdije çdo përpjekje për t’i dhënë fund luftës.
Sipas tij, vendimi për të lejuar përdorimin më të gjerë të armëve në territorin rus nuk është i ri, por ishte marrë më herët dhe ishte mbajtur i fshehtë.
“Kjo masë e veçantë zbulon cilësinë dhe aftësitë e atyre që janë ngritur në pushtet në Evropë,” deklaroi kreu i diplomacisë ruse, duke vënë në pikëpyetje integritetin dhe prioritetet e liderëve perëndimorë.
Lavrov u shpreh se udhëheqësit evropianë po veprojnë në funksion të interesave të tyre personale dhe politikë.
“Nëse lufta ndalet, karrierat e tyre politike kanë mbaruar. Ata i vënë interesat e tyre personale mbi njerëzit e tyre,” tha ai, duke i akuzuar për obsesion me përshkallëzimin ushtarak.
Toni ndryshe për Trumpin
Në kontrast me tonin kritik ndaj Evropës, Lavrov u shpreh më i moderuar në lidhje me qasjen e presidentit amerikan, Donald Trump, ndaj konfliktit në Ukrainë.
“Trump dëshiron rezultate dhe kur ai zbulon se evropianët po ia sabotojnë përpjekjet, është normale që retorika e tij të ndryshojë,” komentoi Lavrov.
Ai i bëri thirrje Evropës që të ndalojë sabotimin e përpjekjeve për paqe, duke theksuar se është përmbajtja ajo që ka rëndësi, jo retorika.
Deklaratat vijnë mes intensifikimit të luftimeve
Komentet e Lavrovit vijnë në një moment kur Rusia ka shtuar ndjeshëm sulmet ajrore mbi Ukrainën. Bastisja e fundit është përshkruar nga autoritetet si një nga më të mëdhatë që nga fillimi i luftës në shkurt 2022, duke ngritur tensionet në një nivel të ri ndërkombëtar.
