Lidhja Demokratike e Kosovës (LDK) ka reaguar pas vendimit të fundit të Gjykatës Supreme të Republikës së Kosovës, duke e cilësuar atë si konfirmim të qartë të shkeljeve të rënda kushtetuese dhe ligjore të kryera nga disa deputetë, të cilët kanë vazhduar të ushtrojnë funksione ekzekutive edhe pas certifikimit nga Komisioni Qendror i Zgjedhjeve (KQZ).
Sipas LDK-së, vendimi i Gjykatës konstaton qartazi se ministrat e certifikuar si deputetë kanë vepruar në kundërshtim të plotë me Kushtetutën dhe Ligjin për Qeverinë, duke uzurpuar funksionet publike dhe duke marrë vendime në mënyrë të paligjshme dhe arbitrare pas përfundimit të mandatit.
17 kallëzime penale ndaj ish-ministrave, LDK njofton dërgimin e vendimit në Prokurori
Në komunikatën për media, LDK ka bërë të ditur se deri më tani ka ushtruar 17 kallëzime penale ndaj ish-ministrave që, pavarësisht se ishin certifikuar si deputetë, kanë vazhduar të veprojnë si ministra në detyrë, duke ndërmarrë veprime që bien ndesh me rendin kushtetues dhe parimet e shtetit të së drejtës.
“Në emër të interesit publik dhe rendit demokratik kushtetues, LDK ka ndërmarrë të gjitha hapat ligjorë të nevojshëm për të mbrojtur integritetin institucional të Republikës së Kosovës”, thuhet në deklaratë.
LDK njofton se nesër do të deponojë vendimin e Gjykatës Supreme në Prokurori, duke e konsideruar atë një provë kyçe që mbështet kallëzimet penale të ngritura nga partia.
Thirrje për veprim urgjent nga Prokuroria e Shtetit
LDK i bën thirrje Prokurorisë së Shtetit që të trajtojë me prioritet këto shkelje dhe të veprojë pa vonesë mbi bazën e kallëzimeve të parashtruara nga deputetët e saj. “Kosova nuk mund të lejojë që institucionet të uzurpohen për interesa të një partie politike. Zbatimi i ligjit nuk është opsional, por detyrim i panegociueshëm për çdo zyrtar publik”, theksohet në reagim.
Ky vendim i Gjykatës Supreme vjen në një periudhë të tensionuar politike, ku çështja e funksionalizimit të institucioneve ka nxitur debate të forta mes partive dhe ka rikthyer vëmendjen mbi kushtetutshmërinë dhe ndarjen e pushteteve në vend.
