Kryesia e Lidhjes Demokratike të Kosovës (LDK) dhe Grupi i saj Parlamentar kanë dalë me një deklaratë të përbashkët politike, pas takimit të sotëm të kryetarit të LDK-së, Lumir Abdixhiku, me Presidenten e Republikës së Kosovës, në përpjekje për të gjetur zgjidhje ndaj krizës tre mujore politike dhe institucionale që ka paralizuar vendin.
Në deklaratë, LDK thekson se Kosova aktualisht po përballet me një situatë të rëndë, pa Kuvend funksional dhe pa qeveri të konsoliduar, gjë që ka sjellë mungesë drejtimi dhe mungesë përgjigjesh për nevojat e qytetarëve.
LDK e konsideron detyrim politik, moral dhe kushtetues paraqitjen e një qëndrimi të qartë për tejkalimin e kësaj krize. Sipas partisë, situata aktuale është pasojë e paaftësisë së partisë fituese për të krijuar një shumicë parlamentare, për të zgjedhur kryetarin e Kuvendit dhe për të funksionalizuar institucionet.
Në deklaratë kritikohet përsëritja e paefekt e procesit për zgjedhjen e kryetarit të Kuvendit, i cili ka dështuar tashmë pesëmbëdhjetë herë dhe pritet të dështohet për herë të gjashtëmbëdhjetë. LDK e cilëson këtë si një përpjekje arbitrare për të imponuar dëshira politike që nuk përputhen me realitetin institucional.
Kryesia e LDK-së paralajmëron se zvarritja e mëtejme për të ndërtuar institucione të reja përbën rrezik për rendin kushtetues dhe dëmton rëndë interesat e qytetarëve, duke i lënë ata nën një qeveri në detyrë që, sipas LDK-së, po vepron përtej kufijve kushtetues dhe ligjorë.
Për tejkalimin e krizës, LDK ka propozuar formimin e një qeverie gjithëpërfshirëse kalimtare, me mandat të qartë dhe detyra të përcaktuara saktësisht. Sipas kësaj partie, ky është modeli më i përshtatshëm për të kthyer vendin në stabilitet institucional dhe politik.
LDK bën thirrje të gjitha partive politike që të mbështesin këtë propozim si zgjidhjen më të arsyeshme për kapërcimin e krizës së thellë politike që ka mbërthyer Kosovën.
