Presidenti i Koresë së Jugut, Lee Jae-myung, zhvilloi sot takimin e tij të parë zyrtar me Presidentin amerikan, Donald Trump, në Shtëpinë e Bardhë. Në fokus të bisedimeve ishin marrëdhëniet tregtare, investimet strategjike dhe siguria rajonale, duke reflektuar rëndësinë e partneritetit mes dy vendeve.
Takimi vjen pas marrëveshjes tregtare të korrikut, me të cilën SHBA ra dakord të ulë tarifat ndaj Koresë së Jugut në 15 përqind, nga 25 përqind të propozuara fillimisht. Marrëveshja përfshin gjithashtu zotimin e Seulit për të blerë energji amerikane me vlerë 100 miliardë dollarë dhe për të investuar 350 miliardë dollarë në ekonominë amerikane.
Lee mbërriti në Uashington pas një vizite në Tokio, ku u takua me kryeministrin japonez Shigeru Ishiba. Ai shoqërohet nga Zonja e Parë, Kim Hea-kyung, dhe një delegacion i përbërë nga drejtues të korporatave kryesore koreano-jugore si Samsung, SK Group, Hyundai dhe LG. Vetëm këto kompani pritet të investojnë mbi 91 miliardë dollarë në SHBA, sipas të përditshmes Maeil Business Newspaper.
Ekspertët vlerësojnë se bisedimet do të jenë të vështira dhe të paparashikueshme. Mason Richey, profesor në Universitetin HUFS, tha për Al Jazeera se “edhe pse tarifat aktuale mund të mbeten të pandryshuara, pjesa e investimeve pritet të jetë subjekt i negociatave të paparashikueshme nga Shtëpia e Bardhë”.
Një tjetër temë kyçe është partneriteti në industrinë e ndërtimit të anijeve. Uashingtoni dhe Seuli po diskutojnë një projekt prej 150 miliardë dollarësh për të forcuar kapacitetet amerikane në këtë sektor, në kuadër të rivalitetit me Kinën. Për këtë arsye, Lee pritet të vizitojë edhe Kantierin Detar të Filadelfias, të blerë vitin e kaluar nga kompania koreane Hanwha Group.
Sektori i gjysmëpërçuesve dhe baterive mbetet gjithashtu prioritet i administratës Trump, ndërsa Seuli ka shprehur gatishmëri për të qenë partner kryesor. Ndërkohë, siguria rajonale dhe kërcënimet nga Koreja e Veriut janë një tjetër pikë e nxehtë e bisedimeve.
“Presionet për ndryshimin e rolit të trupave amerikane në Gadishullin Korean janë rritur prej vitesh, veçanërisht për shkak të rivalitetit SHBA–Kinë,” tha Jenny Town, drejtoreshë e programit kërkimor 38 North. Aktualisht, në Korenë e Jugut janë të stacionuar rreth 28,500 trupa amerikane.
Trump ka përsëritur se Seuli duhet të paguajë më shumë për praninë e trupave amerikane, duke kërkuar që shpenzimet e mbrojtjes të arrijnë deri në 5 përqind të PBB-së. Aktualisht, buxheti i mbrojtjes së Koresë së Jugut është në nivelin e 3.5 përqind.
Takimi Lee-Trump zhvillohet në një kohë tensionesh të shtuara me Phenianin. Kohët e fundit, Kim Yo Jong, motra e udhëheqësit Kim Jong Un, hodhi poshtë mundësinë e dialogut me Seulin, por analistët vlerësojnë se deklaratat e saj lënë hapësirë për kontakte të reja mes SHBA-së dhe Koresë së Veriut.
Për ekspertët, samiti në Uashington është një provë e rëndësishme për Lee Jae-myung në konsolidimin e rolit të Koresë së Jugut si partner strategjik i SHBA-së, si në fushën ekonomike ashtu edhe në atë të sigurisë rajonale.
