Lëngu i lakrës së freskët është një nga aleatët më të fuqishëm të sistemit tretës, duke ofruar mbështetje të veçantë për ata që vuajnë nga urthi, refluksi, bakteret Helicobacter pylori apo gjendje që i paraprijnë ulçerës në stomak dhe duoden.
Ky lëng natyral është i pasur me vitaminë C dhe përmban aminoacidin glutaminë – një përbërës që ndihmon në pastrimin e zorrëve dhe rikuperimin e mukozës së traktit tretës. Falë vetive të tij antioksiduese, ai ndihmon edhe në mbrojtjen e qelizave nga dëmtimet e shkaktuara nga radikalet e lira.
Si ta përgatisni:
Çdo lloj lakre mund të përdoret për përgatitjen e lëngut, megjithatë lakra e kuqe ka përmbajtje më të lartë të antocianinës – një antioksidant që mbron qelizat e trurit. Për përgatitje, rekomandohet përdorimi i një shtrydhëseje frutash.
Pini 1 dl lëng, tre herë në ditë, gjithmonë para vakteve dhe gjithmonë të përgatitur i freskët. Lëngu nuk duhet të lihet në ajër për shumë kohë, pasi oksidohet shpejt dhe humbet vetitë e tij medicinale.
Lëngu i lakrës mund të kombinohet edhe me karrota për një efekt më të mirë, por nuk rekomandohet shtimi i kripës, limonit apo erëzave të tjera.
Kujdes: Edhe pse i shëndetshëm, tek disa persona mund të shkaktojë fryrje. Konsultohuni me mjekun tuaj nëse vuani nga çrregullime të traktit tretës përpara se ta përdorni rregullisht.
