Duke filluar nga data 5 maj 2025, qytetarët e Kosovës do të mund të udhëtojnë pa viza drejt Izraelit për qëllime turistike. Lajmi është konfirmuar nga Ambasadorja e Izraelit në Kosovë, Tamar Ziv, përmes një postimi në platformën X (ish-Twitter).
“Vizitorët nga Kosova që mbajnë një pasaportë të vlefshme do të përfshihen në listën e vendeve të përjashtuara nga viza për udhëtim në Izrael,” shkroi ambasadorja, duke e cilësuar vendimin si një hap drejt forcimit të mëtejmë të marrëdhënieve ndërmjet dy vendeve.
Kërkohet aplikim paraprak për ETA-IL
Megjithatë, përpara nisjes, qytetarët e Kosovës do të duhet të aplikojnë për një ETA-IL (Autorizim Elektronik për Udhëtim), të cilin duhet ta sigurojnë të paktën 72 orë para mbërritjes në Izrael.
Sipas njoftimit të Ambasadës, ETA-IL është një autorizim elektronik i nevojshëm për të hyrë në Izrael dhe vlen për qëndrime deri në 90 ditë për çdo vizitë. Procesi i aplikimit për ETA-IL cilësohet si i thjeshtë dhe i shpejtë, nëse plotësohen të gjitha kushtet.
Udhëzime dhe ftesë miqësore nga Ambasada
Ambasada ka ofruar edhe një adresë zyrtare për më shumë informacione rreth aplikimit:
👉 https://israel-entry.piba.gov.il/learn-about/
Në fund të njoftimit, Ambasada e Izraelit në Kosovë i drejtohet qytetarëve me një mesazh miqësor:
“Mirë se vini në Izrael dhe ju urojmë një vizitë të mrekullueshme!”
