Në prag të Ditës Ndërkombëtare të Personave të Zhdukur, krerët më të lartë institucionalë të vendit u përkulën pranë monumentit kushtuar të zhdukurve me dhunë gjatë luftës në Kosovë. Kryeministri Albin Kurti, Presidentja Vjosa Osmani dhe Kryetari i Kuvendit Dimal Basha theksuan se zbardhja e fatit të 1584 personave që ende figurojnë të pagjetur mbetet prioritet i institucioneve të Republikës së Kosovës.
Kryeministri Kurti deklaroi se gjatë vitit të kaluar janë kryer gërmime në 23 lokacione, ndërsa sivjet në 18 lokacione të tjera, me synim gjetjen e mbetjeve mortore të viktimave. Ai kritikoi vonesat e Serbisë për të rifilluar gërmimet në Kozhle dhe Batajnicë, pavarësisht Marrëveshjes së Brukselit dhe Deklaratës përkatëse të nënshkruara që prej dy vitesh.
Presidentja Osmani theksoi se mohimi i drejtësisë për viktimat është pasojë e mohimit të krimeve të kryera nga Serbia, ndërsa Kryetari i Kuvendit, Dimal Basha, shtoi se zbardhja e së vërtetës mbetet detyrim shtetëror dhe moral ndaj familjarëve të të zhdukurve.
Krerët institucionalë falënderuan partnerët ndërkombëtarë për mbështetjen profesionale e teknologjike, por kërkuan që të ushtrohet më shumë trysni ndaj Beogradit zyrtar, pasi arkivat dhe autoritetet serbe mbajnë të fshehur të dhëna thelbësore mbi krimet e luftës dhe fatin e të zhdukurve.
