Kryetari i Nismës Socialdemokrate, Fatmir Limaj, ka deklaruar se takimi i liderëve partiakë të shtunën nuk ka prodhuar ndonjë përparim konkret drejt zgjidhjes së ngërçit institucional, duke theksuar se diskutimet ishin më shumë për aktgjykimin e Gjykatës Kushtetuese sesa për rrugëdalje nga kriza aktuale politike.
“Takimi më tepër ka shkuar rreth qasjeve dhe këndvështrimeve të secilit se si e shohin aktgjykimin e Gjykatës Kushtetuese, e më pak është folur për atë që besoj unë është tema kryesore – kriza politike. Krizat si kjo zgjidhen me marrëveshje politike. Edhe ai aktgjykim e ka dhënë këtë udhëzim”, u shpreh Limaj pas takimit.
Duke komentuar rolin e partisë më të madhe, ai i ka bërë thirrje Lëvizjes Vetëvendosje që të ndërmarrë hapa konkretë për të siguruar shumicën parlamentare. “Vetëvendosja si partia më e madhe ka përgjegjësinë që të sigurojë shumicën. Për shkak të situatës aktuale, duhet bërë kompromise dhe të gjendet rruga për një shumicë funksionale në Kuvend”, theksoi ai.
Deklaratat e Limajt vijnë në kohën kur Kuvendi i Kosovës vazhdon të mbetet i pakonstituuar pas disa tentativave të pasuksesshme për zgjedhjen e kryetarit dhe udhëheqësisë së tij. Gjykata Kushtetuese ka përcaktuar afatin prej 30 ditësh për përmbylljen e procesit, duke nxitur liderët politikë drejt gjetjes së një zgjidhjeje për të evituar thellimin e krizës institucionale.
