Kryetari i Nismës Socialdemokrate, Fatmir Limaj, ka zbuluar detaje të pathëna më parë rreth takimeve kokë më kokë me liderin e Lëvizjes Vetëvendosje, Albin Kurti, duke hedhur dritë mbi një marrëveshje xhentëlmenësh që – sipas tij – ishte arritur për postin e kryetarit të Kuvendit të Kosovës.
Në një intervistë për emisionin Rubikon, Limaj tregoi se një natë para seancës konstituive, ai dhe Kurti ishin takuar vetëm për vetëm në Kryeministri, ku kishin rënë dakord verbalisht që Limaj të propozohëj për kryetar të Kuvendit.
“Kemi pasur një marrëveshje xhentëlmenësh, gojore. Jemi pajtuar dhe kemi cakërruar marrëveshjen me ujë. Nuk ka pasur marrëveshje me shkrim, vetëm një dakordim mes dy burrave që deshën ta zgjidhin ngërçin institucional”, tha Limaj, duke theksuar se takimi ishte zhvilluar vonë në mbrëmje, mes orës 20:00 dhe 23:00.
Sipas tij, marrëveshja ishte që të nesërmen, në seancën konstituive, ai të propozohej dhe votohej për postin e kryetarit të Kuvendit – një institucion kyç që tashmë është bllokuar për më shumë se 30 seanca.
Por në vend të kësaj, gjatë asaj seance, Vetëvendosje propozoi emrin e Albulena Haxhiut, një veprim që Limaj e cilëson si thyerje të marrëveshjes dhe që – sipas tij – kontribuoi në thellimin e krizës institucionale.
“Unë i thashë Kurtit nuk jam i interesuar për qeveri. Nëse do partneritet, është kjo – nëse do numrat”, deklaroi Limaj, duke nënvizuar se ishte i gatshëm të kontribuonte në zhbllokimin e institucioneve, por jo të merrte pjesë në qeverisje.
Kjo deklaratë e Limajt vjen në një moment kur Kuvendi i Kosovës vazhdon të jetë në ngërç institucional, me mosmarrëveshje të thella mes partive politike që po e pamundësojnë konstituimin e legjislaturës së re.
