Kryetari i Komunës së Drenasit, Ramiz Lladrovci, ka reaguar ashpër ndaj asaj që e cilëson si “tentativa për presion” përmes telefonatave dhe rrjeteve sociale ndaj qytetarëve që shprehin publikisht mbështetje për kandidaturën e tij.
Përmes një postimi në rrjete sociale, Lladrovci ka bërë të ditur se ndërmjet personave të shqetësuar janë edhe nipat e tij, të cilët janë kontaktuar me qëllim që të ndalojnë komentet dhe përkrahjen publike në rrjetet sociale.
“Telefonatat kanë ardhur si rezultat i panikut nga njëri prej familjarëve të ashtuquajturës ‘dhjetëshe’,” – ka shkruar ai, duke e cilësuar këtë praktikë si të papranueshme, jodemokratike dhe larg çdo norme të kulturës politike.
Ai ka paralajmëruar se në rast të përsëritjes së këtyre veprimeve, do të bëjë denoncim në organet e rendit. “Shqetësimi përmes telefonit apo mjeteve sociale është vepër e dënueshme. Moti jemi të operuar nga frika!” – ka theksuar Lladrovci në reagimin e tij.
Kjo deklaratë vjen në një kohë kur fushatat politike në nivel lokal janë intensifikuar dhe atmosfera zgjedhore po shoqërohet me tensione të shtuara mes rivalëve politikë.
