Kryetari i Komunës së Drenasit dhe anëtari i Partisë Demokratike të Kosovës (PDK), Ramiz Lladrovci, ka reaguar ashpër pas publikimit të letrës së liderit të Lëvizjes Vetëvendosje (VV), Albin Kurti, drejtuar kreut të LDK-së, Lumir Abdixhiku, ku i propozohet një marrëveshje për bashkëqeverisje.
Lladrovci është fokusuar në pjesën ku Kurti nënvizon se nuk është i interesuar për koalicion me PDK-në, duke e interpretuar këtë si një tentativë për ta margjinalizuar partinë e dytë më të madhe në vend dhe për të gërryer mbështetjen elektorale të LDK-së.
“Letrën e VV-së e shoh si rifillim i gërryerjes finale të elektoratit që nuk arriti ta marrë nga LDK në dy palë zgjedhjet e kaluara, ndërsa PDK mbetet rrush i thartë për partinë e parë – dihet, rrushi që nuk arrihet, është i thartë,” tha Lladrovci në një reagim publik.
Reagimi i tij vjen pas ftesës që Kurti i ka bërë zyrtarisht LDK-së për një marrëveshje politike, duke e përjashtuar mundësinë e bashkëpunimit me PDK-në. Kurti në letër ka theksuar se është i interesuar për një marrëveshje me LDK-në si rrugë për të ndërtuar institucione funksionale pas një ngërçi të gjatë politik.
Kjo deklaratë nga Lladrovci shton tensionin ndërpartiak, në një kohë kur vendi ndodhet në një situatë të ndjeshme politike dhe përballë nevojës për konsolidimin e institucioneve të reja.
