Konflikti midis Rusisë dhe Ukrainës po hyn në një fazë gjithnjë e më të ashpër teknologjike, me të dyja palët që po e përdorin armën e dronëve për të goditur infrastrukturën energjetike dhe objektet industriale të njëra-tjetrës. Në 24 orët e fundit, një sulm rus me dronë në rajonin e Odesës ka shkaktuar dëme të mëdha në rrjetin energjetik dhe kompaninë shtetërore hekurudhore Ukrzaliznytsia, ndërsa Ukraina ka sulmuar për të shtatën herë një rafineri nafte në qytetin rus të Saratovit.
Sipas guvernatorit rajonal Oleg Kiper, sulmi në Odesë u shoqërua me shpërthime të fuqishme dhe disa zjarre. Ai njoftoi se një depo dhe një ndërtesë administrative e kompanisë hekurudhore janë dëmtuar rëndë, duke e paralizuar përkohësisht transportin e mallrave në zonë. “Rusia ka sulmuar infrastrukturën energjetike çdo natë që nga fillimi i vjeshtës,” tha Kiper, duke paralajmëruar se rajoni po përballet me ndërprerje të shpeshta të energjisë elektrike.
Nga ana tjetër, forcat ukrainase kanë raportuar se kanë kryer një sulm me dronë ndaj një rafinerie strategjike në Saratov, një qytet i vendosur përgjatë lumit Vollga, që furnizon me karburant ushtrinë ruse. Sipas Shtabit të Përgjithshëm të Ukrainës, në objekt janë regjistruar shpërthime dhe zjarre, ndërsa guvernatori rus Roman Busargin konfirmoi incidentin, duke e cilësuar si një “sulm ndaj një objekti civil”. Një person u plagos dhe disa ndërtesa përreth pësuan dëme materiale.
Ukraina gjithashtu ka goditur një objekt nafte në portin e Feodosias, në gadishullin e pushtuar të Krimesë, si dhe një depo logjistike në rajonin e Donetskut, duke vazhduar strategjinë e saj për të goditur zinxhirin e furnizimeve ruse.
Ndërkohë, tensionet po kalojnë kufijtë: mbetjet e një droni të dyshuar rus ranë në territorin e Rumanisë, pas sulmeve të natës në portet ukrainase të Danubit, pranë kufirit rumun. Ministria e Mbrojtjes në Bukuresht konfirmoi incidentin, duke sqaruar se nuk pati dëme materiale apo viktima, por fragmentet e dronit ranë në një zonë të banuar.
Presidenti rumun Nicusor Dan e përshkroi ngjarjen si një “incident aksidental”, por Ministrja e Jashtme Oana Toiu reagoi ashpër, duke e cilësuar si “një tjetër sulm të pamatur rus ndaj Ukrainës me pasoja në territorin rumun.”
“Këto veprime janë pjesë e një modeli të qartë të luftës agresive të Rusisë,” shkroi ajo në platformën X. “Janë provokime sistematike. Ne nuk do të hezitojmë të rrisim çmimin që Rusia paguan për këto akte të paligjshme.”
Ekspertët perëndimorë vlerësojnë se lufta e dronëve midis dy vendeve po bëhet gjithnjë e më intensive, me objektiva që shtrihen nga rafinieritë dhe rrjetet energjetike deri te portet strategjike të Detit të Zi, duke e bërë kufirin midis objektivave ushtarake dhe civile gjithnjë e më të paqartë.
Në terren, as Rusia dhe as Ukraina nuk japin shenja të tërheqjes – përkundrazi, të dyja palët po përpiqen të dëmtojnë kapacitetet logjistike dhe energjetike të kundërshtarit, duke e kthyer energjinë dhe transportin në frontin e ri të luftës moderne.
