Në prag të finales së madhe të Ligës së Kampionëve kundër Interit, trajneri i Paris Saint-Germain, Luis Enrique, ka folur për mikrofonat e “Sky Sport”, duke ndarë emocionet, analizën taktike dhe pritshmëritë e tij për ndeshjen që mund të bëjë historinë për klubin francez.
“Ndjej fat dhe privilegj që po luajmë ndeshjen më të mirë të mundshme. Përballë kemi një skuadër të madhe si Interi, që ka një stil ndryshe loje, me dy sulmues të mirëfilltë,” tha Enrique.
Fokusi taktik dhe përgatitja ndaj Interit
Trajneri spanjoll theksoi se PSG-ja ka përgatitur çdo detaj për të përballuar presionin dhe rreziqet që mund të sjellë skuadra italiane gjatë lojës.
“Qëllimi ynë është ta çojmë lojën në drejtimin që duam ne. Duhet ta kemi topin, edhe pse Interi ushtron presion shumë mirë. Çelësi do të jetë përshtatja me rrethanat që lindin gjatë ndeshjes,” tha Enrique, duke shtuar se skuadra e tij është e gatshme të japë gjithçka në fushë.
Presioni i trofeut dhe qetësia e Enrique-s
Enrique nuk e fshehu rëndësinë e këtij trofeu për projektin e PSG-së:
“Që në prezantimin tim kam thënë që objektivi është fitorja e trofeve të mëdhenj. Champions-i është ai që na mungon. Ka presion, por unë e përjetoj me qetësi dhe vetëdije. Më e rëndësishmja është të vazhdojmë të luajmë siç dimë.”
Donnarumma dhe rëndësia e përvojës
I pyetur për portierin Gianluigi Donnarumma, Enrique e cilësoi atë si një nga shtyllat e ekipit, por nënvizoi edhe nevojën që ai të dijë të përballojë presionin.
“Kur je në këtë nivel, kritikat janë të pashmangshme. Donnarumma është i fortë dhe po rritet. Kemi një grup të ri, por me përvojë që vjen nga loja. Nuk kam frikë të aktivizoj lojtarë të rinj, duhet të luajnë më të mirët, pa marrë parasysh moshën,” përfundoi trajneri i PSG-së.
Finalja vendimtare
Finalja e Champions League mes Paris Saint-Germain dhe Interit pritet të zhvillohet të shtunën në mbrëmje, me PSG-në që synon të fitojë trofeun më të rëndësishëm evropian për herë të parë në historinë e saj. Enrique dhe skuadra e tij janë të bindur: ky mund të jetë momenti i tyre.
