Kryetari i LDK-së, Lumir Abdixhiku, ka bërë të ditur dje se gjatë mbrëmjes së nominimit të Glauk Konjufcës, ka shprehur gatishmërinë për të votuar një “paketë të Presidentes”, që përfshinte zgjatjen e buxhetit për 3 muaj, votimin e ligjeve për Prishtinën dhe Gjilanin, sigurimin e pagave për RTK-në dhe Paketën Evropiane të Rritjes.
Sipas Abdixhikut, Presidentja e Kosovës e kishte përcjellë këtë propozim Lëvizjes Vetëvendosje, e cila ishte shprehur pozitivisht. Ai kontaktuar edhe liderët e PDK-së, AAK-së dhe Nismës, si dhe disa ambasadorë të QUINT-it, për të diskutuar mundësinë e votimit të kësaj pakete.
Abdixhiku theksoi se për 15 ditë nuk pati asnjë reagim, duke e parë vonesën si një tendencë për krijim krize dhe fajësim politik. Ai shtoi se propozimi u rikthye më pas te caktimi i zgjedhjeve dhe nënshkrimi i dekretit për zhbërjen e Kuvendit, ku LDK nuk ishte kundër nëse kishte gatishmëri nga të gjithë aktorët.
“Ky propozim, i hapur dhe i nxitur nga unë, u shndërrua në tavolinën e zgjedhjeve. Sot habitem se me sa lehtësi fshihet ky fakt dhe kjo e vërtetë,” tha Abdixhiku.
Ai përfundoi duke theksuar se bllokada është e qëllimshme dhe zgjatë tash e 12 muaj, duke shtuar se sfidat politike kanë zgjidhje dhe se Kosova mund të bëhet lehtë.
