Presidenti i Venezuelës, Nicolás Maduro, deklaroi se është gati të dialogojë drejtpërdrejt dhe “pa asnjë hezitim” me presidentin amerikan Donald Trump, pasi ky i fundit la të hapur mundësinë e bisedimeve. Reagimi vjen në një moment tensionesh të larta, ku SHBA ka vendosur mjete të fuqishme ushtarake në Karaibe në kuadër të operacioneve kundër trafikut të drogës.
Maduro, gjatë një emisioni të tij javor, tha se Venezuela është e gatshme për bisedime, por nuk do të lejojë “bombardimin dhe masakrimin e popullit venezuelian”.
Ai shtoi se ekzistojnë “sektorë të pushtetit” në SHBA që po i shtyjnë Trump drejt një “gabimi historik” – një ndërhyrje ushtarake kundër Venezuelës – që sipas tij “do të shkatërronte politikisht” presidentin amerikan.
Nga ana tjetër, Trump i tha gazetarëve se “në një moment do të flas me të”, por e quajti Maduros “jo të mirë për Shtetet e Bashkuara”. I pyetur nëse përjashtonte ndërhyrjen ushtarake, Trump u përgjigj shkurt: “Nuk përjashtoj asgjë”.
Sipas Pentagonit, nga gushti SHBA ka rritur ndjeshëm prezencën ushtarake në Karaibe dhe ka kryer rreth 20 sulme ndaj mjeteve që supozohet të transportonin drogë, duke shkaktuar mbi 80 viktima.
