Mandati 4-vjeçar: VV’ja lavdohet për inflacionin, krizën energjetike, veriun, vizat

Në këtë video, partia në pushtet krekoset për përmbylljen e mandatit të plotë 4-vjeçar, ndërsa pretendon se sfidat kryesore i kaloi me sukses.

“Pandemia, lufta në Ukrainë, kriza energjetike, inflacioni, sulmet terroriste në veri. Duke kaluar me sukses çdo sfidë, Qeveria Kurti e përmbushi mandatin e plotë me përkushtim e punë të palodhshme”, thuhet në videon e shpërndarë.

Megjithëse nivelet e inflacionit gjatë Qeverisë Kurti janë më të lartat në historinë e Kosovës (shiko ASK-në), duke u krahasuar me ato gjatë kohës së krizës financiare botërore të vitit 2008, si duket për këtë parti inflacioni është kaluar me sukses.

Në anën tjetër, gjatë Qeverisë Kurti është shtrenjtuar dy herë energjia elektrike, ndërsa muajin tjetër pritet të bëhet edhe shtrenjtimi i tretë për 15%. Por, edhe në këtë fushë pushteti pretendon të ketë pasur sukses.

Pastaj, gjatë videos po ashtu përmendet edhe politika e jashtme gjatë kësaj qeverisjeje, edhe kjo si rrëfim suksesi disi.

“Shtuam miqësi të jashtme”, thuhet në video nga partia e cila e zhyti Kosovën në sanksione nga Bashkimi Europian dhe e cila e detyroi SHBA-në të dalë me qëndrim zyrtar që nuk është e interesuar t’i ndihmojë Kosovës në rrugën e saj për anëtarësim të plotë në organizata ndërkombëtare.

Në përgjithësi, partia në pushtet pretendon për sukses në të gjitha fushat, ndërsa realiteti në të cilin gjendet Kosova tregon për diçka tjetër. Por, qofshin këto pohime të vërteta apo tentim për propagandë, kjo parti i fitoi mbi 42% të votave në zgjedhjet e fundit, përkundër mungesës së rezultateve./gazetametro.net