Manjati i kriptovalutave nga Koreja e Jugut, Do Kwon, është deklaruar fajtor për mashtrim në Shtetet e Bashkuara në lidhje me falimentimin 40 miliardë dollarësh të tokenëve TerraUSD dhe Luna.
Bashkëthemeluesi i kompanisë Terraform Labs me seli në Singapor pranoi fajësinë të martën në Gjykatën e Distriktit Jugor të Nju Jorkut, sipas dosjeve gjyqësore. Ai u shpall fajtor për komplot për mashtrim me mallra, mashtrim me letra me vlerë dhe mashtrim me transaksione elektronike, si dhe për kryerjen e mashtrimit me transaksione elektronike.
Si pjesë e marrëveshjes, Kwon pranoi të konfiskonte mbi 19 milionë dollarë të ardhura të fituara nga aktivitetet e tij kriminale, sipas prokurorëve.
Fillimisht, në janar, Kwon ishte deklaruar i pafajshëm për nëntë akuza, përfshirë mashtrim me letra me vlerë, mashtrim elektronik dhe komplot për pastrim parash.
“Do Kwon përdori premtimin teknologjik dhe euforinë e investimeve rreth kriptomonedhës për të kryer një nga mashtrimet më të mëdha në histori,” deklaroi Prokurori i SHBA-së, Jay Clayton. Sipas tij, Kwon tërhoqi dhjetëra miliarda dollarë fonde duke premtuar një stablecoin vetë-stabilizues, por kur tregjet zbuluan se ekosistemi ishte i paqëndrueshëm, sistemi u shemb duke shkaktuar humbje miliardëshe për investitorët në mbarë botën.
Kwon, i cili pritet të dënohet më 11 dhjetor, përballet me deri në 25 vjet burg. Ai u ekstradua në SHBA në dhjetor 2024, pas arrestimit në Mal të Zi, ku kishte kaluar muaj në arrati nga autoritetet.
