Nga Lëvizja Vetëvendosje, Arlind Manxhuka, ka reaguar për zhvillimet e fundit politike dhe procesin e zgjedhjes së presidentit, duke theksuar se partia e tij ka pritur një marrëveshje me opozitën deri në momentet e fundit.
Sipas tij, LVV edhe në të kaluarën ka pasur kundërshtime për emrat e propozuar për presidentë, duke përmendur vitet 2011 dhe 2016, kur sipas tij pushteti i asaj kohe nuk ka kërkuar dialog, por ka reaguar me presion ndaj opozitës.
“Si LVV në vitet 2011 dhe 2016 kemi pasur problem me emrat e përveçëm të atyre që u bënë presidentë asokohe. Dhe në vend të takimeve me neve, pushteti atëbotë na përndiqte e shtypte me polici”, ka shkruar Manxhuka.
Ai shtoi se këtë herë kryeministri Albin Kurti ka pasur komunikim me opozitën, duke përmendur takimet me kryetarin e Partia Demokratike e Kosovës, Bedri Hamza.
Sipas Manxhukës, Hamza është ftuar dy herë në takim nga Kurti dhe komunikimi mes tyre ka qenë normal.
Ai gjithashtu theksoi se Hamza nuk i ka shprehur Kurtit ndonjë kundërshtim personal ndaj kandidatit të LVV-së për president, Glauk Konjufca.
Manxhuka shtoi se LVV e propozoi Konjufcën në fund të afatit kushtetues, duke pritur mundësinë e një marrëveshjeje me opozitën për zgjedhjen e presidentit.
