Të paktën 32 palestinezë janë vrarë të shtunën nga zjarri i trupave izraelite, teksa po përpiqeshin të arrinin në qendrat e shpërndarjes së ndihmës humanitare në jug të Rripit të Gazës. Incidenti ka ndodhur pranë zonës Teina, afër qytetit Khan Younis, rreth tre kilometra nga një nga qendrat e menaxhuara nga Fondacioni Humanitar i Gazës (GHF), një organizatë e mbështetur nga Shtetet e Bashkuara dhe Izraeli.
Sipas dëshmitarëve dhe autoriteteve shëndetësore lokale, trupat izraelite fillimisht kanë qëlluar me të shtëna paralajmëruese, për të më pas hapur zjarr të drejtpërdrejtë ndaj turmave të njerëzve që kërkonin ushqim.
“Pushtimi hapi zjarr ndaj nesh pa dallim,” ka deklaruar Mahmoud Mokeimar, një nga të mbijetuarit që ndodhej në zonë. Ai shton se pa të paktën tre trupa të pajetë në tokë dhe dhjetëra të plagosur që tentonin të shpëtonin.
Fondacioni Humanitar i Gazës, i cili ka nisur operacionet humanitare në muajin maj, ka shpërndarë miliona vakte për popullatën e uritur palestineze. Organizata operon në katër lokacione, të cilat ndodhen në zona nën kontrollin e ushtrisë izraelite.
Nga ana tjetër, ushtria izraelite ka deklaruar se ka ndërmarrë veprime vetëm pasi disa persona të dyshuar iu afruan trupave ushtarake pranë qytetit Rafah, duke injoruar paralajmërimet për të qëndruar larg. Sipas ushtrisë, incidenti ndodhi gjatë natës, kur qendrat e shpërndarjes së ndihmës ishin të mbyllura.
Në një deklaratë për media, GHF mohoi që incidenti të ketë ndodhur në apo pranë ndonjë prej qendrave të saj. “Ne i kemi paralajmëruar vazhdimisht qytetarët të mos udhëtojnë drejt qendrave tona gjatë natës dhe në orët e hershme të mëngjesit,” thuhet në deklaratë.
Ndërkohë, autoritetet izraelite dhe organizatat ndërkombëtare humanitare vazhdojnë të përplasen për mënyrën e shpërndarjes së ndihmës në Gaza. SHBA dhe Izraeli kanë synuar të zëvendësojnë sistemin e shpërndarjes së ndihmës të udhëhequr nga Kombet e Bashkuara, me arsyetimin se furnizimet përfundojnë në duart e militantëve të Hamasit – një pretendim që OKB-ja e ka mohuar kategorikisht.
Tragjedia e së shtunës vjen në një moment kur kriza humanitare në Gaza vazhdon të thellohet, duke i ekspozuar civilët ndaj urisë, dhunës dhe mungesës së sigurisë minimale për mbijetesë.
